Marşrut avtobuslarının yalançı təqdimatı -SUMQAYITDA

İki ay bundan öncə ictimaiyyətə nümayiş etdirilən avtobuslar yoxa çıxıb




Sumqayitfakt.az

Son zamanlar Sumqayıtda rəsmi dairələr tərəfindən yayılan yalan məlumatlar, vətəndaşları şirin vədlərlə aldadıb yola vermək sanki “dəb” halını alıb. İddialarımızı əsaslandırmaq üçün son aylar və günlər sözügedən şəhərdə baş verən bir neçə xoşagəlməz olayı və mənzərəni misal kimi xatırlada bilərik.

Ötən ilin noyabr ayının ortalarında şəhərin baş meydanında, icra hakimiyyətinin inzibati binasının beş addımlığında 7 nömrəli marşrut üzrə işləyəcək Türkiyə istehsalı olan "Karsan Karatas" markalı 15 ədəd avtobus şəhər icra Hakimiyyəti başçısının müavini səviyyəsində ictimaiyyətə və mediya nümayəndələrinə nümayiş etdirildi. Orda bildirildi ki, təlabata uyğun olaraq, mərhələli şəkildə daha bir neçə avtobus ilin sonuna kimi gətiriləcək və yeni avtobuslar bütün göstəricilərinə görə müasir standartlara tam cavab verəcək. Xüsusi olaraq vurğulandı ki, 7 saylı marşrut üzrə işləyəcək avtobuslar sabahdan xəttə buraxılacaq.

O sabahdan artıq iki aydan çox vaxt keçib. Şəhər əhalisinə mədəni xidmət göstərəcək, günün tələblərinə cavab verən avtobuslardan xəbər - ətər yoxdur. Şəhər əhalisi bu dəfə də yalanın ictimai nümayişinin şahidi oldu...O vaxtdan tərifi xirtdəkdən olan avtobusları gördüm, deyən yoxdur.

Gileylərini Moderator.az-la bölüşən sumqayıtlıları bir sual düşündürür, bu müəmmalı təqdimatın və nümayişin səbəbi nə idi? Vətəndaşlara qarşı növbəti həqarətin və yalanın səbəbi nədir?

Onu da xatırladaq ki, həmin gün 18 ədəd "London taksisi" də orada nümayiş etdirildi. Sözügedən taksilərin sayının da yaxın vaxtlarda 70 ədədə çatdırılacağı (?) vurğulandı. Ancaq həmin taksilər də şəhərdə gözə çarpmır...